بقلم شيخ لكلام الجوال حميد بوكا

" الغـابـة" 

وحشي ليك ياالغـابـة راه كثــــر

وما بقيـت قادر انا نصبــــــــــــر

جايـك اليـوم رانـي مقــــــــــــرَّر

الشـوق هزنـي ليــــك 

حـالـفْ مـا نتـلَّـى ولا نتأخَّــــــــر

جاي بسلاحي مع الرمى نحضــر

الشـوكة مدكٓـوكٓـة مـن الصغـــــر

الغابة ما نتخلَّى عليك

ف الخْمـــــاسيَّـة رانــي نعـمَّــــــر

باغـي نتفـرَّجْ نحـيَّـح ذاك السْــدر

نصيد لـرنـب الحجــل وكْٓـريكٓـــــر

الغـابـة بإذن مَّاليـــــك

الصيـدة بلية والحـال ما يشــــاور

نجْـمــع العــــــــدّة بلاما نشعــــــر

نسيـــر بيــن الشْعَـــاب نتعـثَّـــــــر

الطريـدة هـانا ليــــــك

الصيــدة زيـنـة تفاجــي الخاطـــر

والسلوكٓي ف جنبي ماحْلاه منظر

الغـابـة الحيــاة الغـابـة العْمـــــــــر

الغـابـة روحـي فيــــك.