بقلم الزجال رشيد شرقان

□ سلام ليك.. □

ف لول المشهد 

كان عادي..

غير شوية الدخان

عجعج وساح

شكل ضبابة خفيفة 

خيمت عل لمكان

من البعيد تبان 

سلبت لعيان

ومَ هي غير لحظة

مثل الكَمزة

كِ الرمشة

دوا صوت قوي

صمك لوذان

مثل الغمزة

كِ الرعشة

سرات ف لبدان

وكان اللي كان

النار شعلت ف لبنان

خربت وكَدات

داعت وتجلات 

جرحت وقتلات

خوفت وصدمات

شي مليوح كسدة باردة

شي مجروح جوارحو راكدة

شي مطروح كلاتو لعوافي الزاندة

شي يجري ك الملهوف

سيطر عليه الخوف

رعب ممزوج ب لحزان

ورجا ف الله..

هاجت النيران 

مثل البركان

ك الطوفان

دوبت حجر وحديد البنيان

يلا كانت من العديان

علاش يا لكنس الغدار؟

علاش زرعتو ألغام

ف درب لهنا؟

علاش زعزعتو الأمان؟

علاش الخراب؟

يا قلوب الصخر 

يا عشاق الكحط

يكفانا ملينا من لمحان

ونتوما مَ تْفرْحُّو غِ الخسران..

توقيع:

رشيد شرقان.