بقلم الزجال الشاعر رشيد شرقان

☆ نار الغربة ☆

الغربة نارها نارين

وبين نيرانها مكواني

الكية ولات كيتين

وهم لفراق انا رشاني

ما ديت من الغربة والو

غير فريع الراس والمحاين

وحداني لا حباب يسالو

تجليت فين بلادي فاين

ما كفى الغربة فرقتني على لحباب

شعلت شيب راسي ولبيض توقد

كَامو لعظام والظهر تحنى و عاب

وليت ك حطب الحطابة للنار موجد

غروني للي قالو جي عندنا تلقانا

وصدقتهم وكلامهم طلع كذوب

غير شافوني وتقلبت لهم الكَانة

يكفاك يا راسي من الغربة توب

خليوني نجدب جدبة

نطيح الساكن فيا

من حر زفر د الغربة 

وعلى اللي دارت بيا

ليك الله يا لغريب

ف الموالفة ما ليك نصيب

تعيى تبري ما تصيب

لا خدمة ؤ وضعك صعيب

توقيع:

رشيد شرقان.