بقلم الزجال محمد الادريسي
قصيدة.......( يا داك الحال)
شحال سالت من دمعة
شحال نزلات من ديك العين
كانت باكية مقموعة
شاردة فضلام الليل
شعلات عوافي مسموعة
شعلات نيران ودخان
تحرق اليابس والخضورة
شحال سالت ع لخدود
زرعت اشواكها المخدوعة
زرعت وردة ع لحدود
وردة دابلة مقطوعة
شحال غار داك الحظ
منها عطى بلكٌفى وصد
فوجه الناس المقهورة
هرب بين اليوم والغد
خلا الخاطر مجرورة
وراه يجزر ويمد
يا لي تتباهى ف ايامك وتعد
راه لعمر قصير ليه الحد
مهما طال الزمان
تبقى الوشمة ف الصورة
يبقى ف لسان الصهد
حروف بين الأوراق منثورة
لا تتقشف علينا
لا تشد الضد
لا تزيد ع الناس المحكٌورة
لو كان تكون جبل
من الرخام تتهد
وسط عواصف
هايجة مسعورة
غار منك الحال وسد
سد الطرقان المشروعة
يا النفس الطامعة فالمجد
ايام المجد سابحة
ف الذهب منقوعة
وانت ضاعت ايامك بالجهد
لباسك قشابة رقاع
من ضيق الحال مصنوعة
ف جلد ايامنا مطبوعة
يا داك الحال................ ...............
7 8 2020
الإدريسي محمد
Commentaires
Enregistrer un commentaire