قلم الشاعرة فاطنة جليدي

البيوت اسرار

كل باب مسدود قصة

ولماسك تلبسو لوجوه

مسرحية وحدة هي

اهنا ولهيه ولهيه

خايفين من لوقت 

ؤعايشين فيه

نحطو اعلى لوجوه ازواق

فينا اللي راكبو لحماق

واللي مقوي ازواق

ؤفينا اللي احياتو نفاق

واللي قنعان بلرزاق 

فقاع الدار العيشة امرار

يخرجو منها يبداو اتصوار

واللي كافي خيرو شرو

خارج ويدعي ياستار

ؤكاين اللي همو عين واسحار

ؤكلا ووجهو كاين مول جوج

واحد داخل بيه وواحد للخروج 

وهذا هازو لكيبر فلكريدي مقجوج

ؤمول النية مابقاش رابح

فين ما داز مسكين يدزوه

ابهل راسو اسطل يحسبوه

ويسد اعلى سرو بابو

يعيش فلمحنة مكتابو

ؤتبقى لبيوت اسرار

كلا يحكي سرو لحبابو

واخا ليوم لحباب غابو

والسر في كاع البير

والبير يسقي كاع ناس الدوار