توقيع شاعر السهول احمد الناصري
رجع بيا يا زمان
ؤانا دريري صغير
ما محمل شطنة
ولا قلبي هاز هموم....
كنت كالفراشة خفيف
فوق النوار نطير
يزيد يعجبني الحال
وأنا ف الكلتة تنعوم....
بوصية لميمة حاضي راسي
من العافية والبير
شحال من مرة تلقاني
بالتراب في حفرة مردوم....
وخا لباسي ماكاين لباس
ويبان بعيني حرير
وبالرجل عندي نعالة
مخرزة غ بشرك الدوم....
ماضارب حساب ليام
ولا بالغد آش يصير
وما حاسب الدنيا
فانية ولينا ما تدوم....
من كلخة داير عودي
فوقو نهوني ونسير
وقلبي ما فيه حسد
ولا ف خفا مسموم....
بيدي و رجلي نلعب
ومعاهم شرير
ملي نرجع عند لميمة
كلي كحل و طاليني لحموم...
مسكينة تلقاني بتعنيقة،
و ديما عليا تغير
مالك على هاذ الحالة؟؟
واش وليتي مجحوم.....
تغسل ليا وتبدل
وتغطيني بحندير
وتعطيني ناكل
وباقي من البزولة ما مفطوم....
بحجرها يديني النعاس
وبيدي خبيز شعير
لا راس دايخ
ولا صدري مكلوم....
آه يا ليام
آش معاك باقي ندير
اليوم راسي شاب
والفم ولى مهدوم....
........أحمد الناصري........
Commentaires
Enregistrer un commentaire