بقلم الزجالة الاصيلة فوزية السلوتي

بوهالي

هذا جهدي تقاضى صبري

واحد يبكي والآخر يشكي

معامن ندوي.. لمن نحكي

نطلب حقي يقولوا عدي

عدي عدي يابن عدي

في نهار نظل نجري

في الليل نبات نحلم برزقي

لي ضيعوه الخوت مني

حيدوا الخضرة داروا المول

درگوا علي لبحور

بلحجر سدوا علي لبحر

لي ليه كنت نشكي همي

ونفرغ حزني وأشجاني

داوي خاوي مع راسي

هذا جاي هذا غادي

وأنا غير بوهالي

كلامي ما فيه معاني

لي فهم بيه يعدي

ولي مافهم راه مهني

هذا شفار هذا قتال

هذا عايش برزق لحلال

والآخر عايش بالحرام

هذا يتيم هذا مقهور

هذا عايش في القصور

هذا طالب رزقو

وهذا بالعصى يسلخو

لي في الغربة يقاسي

ولي في لبلاد مقهور يعاني

الميزريا في بلادي

وزادها الحجر الصحي

هذا يبكي هذا يشكي

والآخر مستور يعدي

عايش بالتكافل الإجتماعي

والمحسنين والعمل الخيري

طالب العلم رزقه مخبي

ما عالم بيه غير ربي

الصندوق عامر ولا خاوي

العيشة ما تتغير يا إخواني

واقع مر يزيد أحزاني

وعيشة الفقر منها نعاني

إمتى يتغير حالك وحالي

وما نبقاش بوهالي

عدي أودي غير عدي

السلوتي فوزية