بقلم الشاعر والزجال رشيد شرقان

□ طلة من بيت الروح □

من شرجم بيت روحي 

المبني ف عقلي 

المبلط ب تخمامي

المطلي ب لون احلامي

المسقف ب تزمامي

المفرش ب نَّظَّامِي

المسقي ب دم جراحي

كنطل عليك يا فلسطين 

يا قرة العين..

كنحقق فيك الشوفة

وكنطول فيك تمعاني

شوفتي كنبداها..

من القدس..متبوعة ب غزة

يافا و أريحا..حيفا وعكا والخليل

وف دشورها وبواديها..

ف زناقيها وشوارعها..

وف وجوه الناس أللي فيها

نظرة مليانة ب الود والمعزة

ويلا عامت ف عيني ذيك القطرة 

وحرقتني ف لحظي مثل الجمرة

 وظهر المشهد ف نظرتي ضبابي

نمنع دورانها وترماشها ف راسي..

ونحبس من التحراك كل احواسي

لسان حالي كيقول

كلام مرصع مصقول

تخطى خط المأمول

وْسَاعَت مريرتو عرض وطول

ب ريق العين..حكَكَْتْ ثاني الشوفة 

شوفة مهيلة ما هي مخطوفة

على اليمين ريت سهول خضرا

غابات وسهول وبحور

اشجار الزيتون والرمان

وحقول سبولها يرقص 

على انغام لرياح

وصوت شق السكات

حي على الفلاح

شمخ مسجد القدس

بان ف اجمل حلة

وشرقت صمعتو

ولمعت بِ سْنا وضاح

بانت واضحة ملي عكستها دمعة

حارة تكَول هاطلة من جفن شمعة

وشكلت على حسكت القنديل

حتلت ف سفحه 

ورشها نسيم الغربي وجمدات

عكبات صغيرة مرسومة شكلها

على خذودها ضحكة

بيضا ما هي صفرا واضحة بيوضتها

لسان حالي قال:

كلام على شكل اغنية..

مبدية ب موال..

مركوبة ب الحال..جدبة

على انغام سنتير يزير

وقصبة وطبيلات وبندير..

بصوت يهز لجبال:....

إمتى نقصدوك ف رْكَبْ

كيجمع كل العربان

ف كَافلة كتسد عين الشمش

ف وقت السروية تسرِّي

قبل ما يهلل الهلال

تشكَ وطى وشعاب

تسلك وديان وجبال

بلا زطاط ولا دلال

وملي يفجر الحال 

وخيط صباحو يبان..

نوقفو لجمال..

ونقيمو الصلاة

نركعو ونسجدو للرحمان

وقتاش نشدو ليك للرحال

يا فلسطين يا قرة لعيان 

بغيت نهيم ف سهولك

بغيت نشم ريحة ترابك

الممزوج ب العرق..

السايل من جبين رجالك

عيالاتك وطفالك..

بغيت نتيمم ب حجارك

ونصلي فوق تربتك النقية ركعات

تحت ظلال اشجار الزيتونات

وقتاش..وقتاش؟ 

توقيع:

رشيد شرقان.