بقلم الشاعرة سعيدة الكبير
تمنيت نكون ثمرة
ف حلق الحgارة
نحيا جمرة
تذوب مرارة
ندير نقطة
ؤ نرجع للسطر
ندوي مع الكاس
ف قلب الكاس
خليت لك روحي
خلي لي ريق عنادك
نشربو دوا ليل ونهار
نكون ليك عصا موسى
تضرب بحر الهم
يتقسم على زوج
واحد لييا والثاني ليهم
عفاك يا داك الكاس
تكايس ... تكايس علي
ما تخليني قطرة شايطة
تنوظ فييا الشياط
والقلب لمشوط ليه
نخلي الليل يداويه
و ف عين الgمرة
وشمني الليل
قلت لو أطلق سراحي
مسمار بين أكتافو دgني
يمشي ف سيفت الغضبان
يرجع لي ثاني ولهان
بالله عليك خليني ... خليني
ما أنا تسليت ما أنت ئيسلي
و ف غمضة عين شفت لهيه
كان ... كان الوقت
مكفن بزوج حروف
ف روح لمخدة
نخمم ونزمم ندوي
هاد المرة مع الماء
لو كان مايا يصبر
نقطع طرف ب طرف
نوصل للمعنى الشاربة
مني كاس لحروف بين ضلوعي
خلخال قلبي درتو ليك هدية
على طبق لغرامة ملي كان
البراح بيني وبينك
كان سكاتي ساكن
روح لمخدة
خلا فييا غدة
سيري يا احلامي
طلعتي انزلتي
حكايتك ليها نهاية
والقبة اللي جمعانة
درتنا كبة تغزل فينا على الدوام
وأحنا نغنيو وراها ...راها ..راها
لغراب هاز لقراب وراها
ماهي غير سوسة درت "الزفندف"
أكلات الحب ؤخلات لينا النقب
طاحت الغفلة ف الحفرة
السكات صاب غطاه
لله يا لخوت فيقو
ديك الغفلة الناعسة بالجملة
سعيدة الكبير
Commentaires
Enregistrer un commentaire