توقيع الشاعرة حسناء العجوري

الفرحة لمعطلة تخليك تبكي 

واش العين ديما تسخا بدموعها

تخليك تهضر بلا ماتحكي

واللي نزلات من العين كفاش رجوعها

شكون اللي يضحك وسط لعزو وهو متكي

شكون اللي يطفي النار ويشبع جوعها

ياغريب الحال شحال زاد شكي 

الدنيا فرقات وقسمات مجموعها

شحال وشحال قدك تشكي

تحرق فتيلة وحدة تحرق كاع شموعها

هكا ولينا غسيل وزيدي يادنيا فركي

اللي نجا ربح واللي توسخ مشا ف طوعها 

ياغريب الحال شحال زاد ضحكي

ملي ولى مشاش لمدينة رجعو سبوعها

باركا يادنيا ماتعجني فينا وتعركي

خلي الفرحة تطبع فينا مطبوعها 

الفرحة المعطلة خلات ناس تبكي

واللي ماقداتو جرى ف الارض وربوعها

بقلم حسناء العجوري