بقلم عاشق الحرف الزجال رشيد شرقان

□ الكَيتارة الباكية □

مال وتارك عل الدوام شاكية

نغمتك زفرة تابعة زفرة يا كَيتارة؟

مال لحانك حزينة شاجية

ف كيسان د حياتي شاربة لمرارة؟

النوتة مضيومة نايحة راغية

من وجاعها باكية بدمعات حارة

مال مولاك جراح روحه دامية

عاصر حزنه غنة توحي بشرارة؟

نار شواقه فقلبه لهيبة كاوية

قابط من الشوك،وظانو  نوارة

**      **    **     **       **

يا كَيتارة أش جرى ليك؟

فين ناس اللي عزفو عليك؟

كان كلشي يتسابق عليك

وملي تكسر لحن ميزانك

ومَ تلات الرنة تواتي المقام

خلاوك غارقة ف حزانك

وكلشي جفاك

وآه من الليل..يا كَيتارة

ومن صمته الثقيل 

اللي يميل شواري السكات

شلا ناس تغرمات ف انغامك

ع طفى لهيب جمارك

وهبى و هبات معاه أسرارك 

ورتيلة عشت بين وتارك

نفرو منك ملي ..

ملامحك بهاتت وذبلات.

توقيع:

رشيد شرقان.