بقلم جلال الدين برغوط

لايمين قلبي

( باللهجة المغربية)

لله يا لايمين قلبي؛ وعشقي للزين، 

نتأمل صورتو فالقمر؛ وسحر انوارو. 

يلا غاب عني غير لحظة؛ نتوحشو فالحين، 

ولا كان جنبي ملّي يتكلم؛ نذوب فاشعارو. 

لله يا لايمين قلبي؛ وماتعرفو لين، 

يوصل اللّي عشق عود الريحان؛ وطيب ازهارو. 

يحسن عوان اللّي مثمّل؛ برحيقو سنين. 

وكية اللّي ما شرب منو؛ ولا عرف اسرارو. 

لله يا لايمين قلبي؛ لاش تحاكموني، 

لاش تقولو بلسان قاصح؛ حبي ملعون. 

أنا اللّي نذوب فزين البها؛ بغيتو تحرموني، 

صرتو توصفوه بكلام جارح؛ والشر مدفون. 

مرة تقولو عليه مغرور؛ والعيب فْ لُوني، 

ومرة تقولو عليه خاين؛ أصلو طمّاع. 

مرة تقولو اللّي نعشقو؛ غَ يبكّي عيوني، 

غْدّة يشوّفني المحاين؛ ويبان الخداع. 

صرتو تخيرو لي فغيرو؛ اللّي ما يبغوني، 

تقولو ع الورد اللي ملوّن؛ منّو بزّاف. 

ذوقكم ماهو شبيه بذوقي؛ والذوق فنوني، 

محبوبي صفاه في المحاسن؛ كامل الاوصاف. 

لله يا لايمين قلبي؛ لاش تحسدوني، 

ربي مقدّر لي المحبة؛ ورزقني السعادة. 

معيشتي فهواه لو كان زايد؛ فقبرو دفنوني، 

حتى البحر وماء الوديان؛ ماكرهشي الزيادة. 

المعقّد انا و حتى المجنون؛ كيف كتسمّوني، 

نعتّوني خديم عند غزالي؛ ولد السلطان. 

مقامي كبير حدا مقامو؛ أَجِيو شوفوني، 

كَيْفيض الخير والنعايم؛ اشكال والوان. 

ونقول ليكم يا الخلايق؛ گعما تهموني، 

مايهمني غير اللي سباني؛ وقلبي اللي بغاه. 

ف مجمع الاحباب جهر بعشقو؛ وما يعيش بدوني، 

فعالكم يا عباد ماتغيّر؛ مكتوب الله.

*** عبد الخالق برغوط ***