بقلم الزجال عبد الرحيم طالبة الصقلي
★بين فياقي ونعاسي★
بين فياقي ونعاسي
حلمت حلمة زمتت انفاسي
وجعاتني وجرحت الصدر
نشوف الدويرة مصضوعة مضرورة
والشجرة اعراشها منثورة
والواد حامل بالرماد ولحموم والصخر
سايگ معاه سرير منبت بالشوك
على ضهرو خيال باين عليه مهلوك
شوكة تقرصو وشوكة تمصو وشوكة تكويه بالجمر
وأنا حيث فضولي وما نسكت
سولتو على حالو لمزفت
قال قرب نهمس ليك ماقاد نتكلم بالجهر
القلب عليل وساجناه لحزان ولقراح
ؤ قضبان لوجع حاجبة عليه لفراح
ؤ مانعة عليه الدفا ونسمة لفجر
يصيح ويتنهد وينين
صباحو مابغا يطلع مدة وسنين
بالظلام لي على لمكان مسيطر
اسمع نحكي ليك على هاذ الزمان قليل لحيا
لي علمنا نرقعو ليام بحبال الماء
وغرس شوكتو المسمومة في گسعة الضهر
سرق منا العنوان
ؤضيعنا فدروب النسيان
وفكل زنقة علق سبورة الصبر
طفى نجوم والگمرة فالسماء
وغيب ضو الشمس في الضحى
ؤحمم لوجوه وطلاها بالعكر
رضعنا من بزولة سكات ومنع لكلام
وطعمنا من فتات ليام وكمم لفام
مانضحكو مانبكيو لي تفلسف يتگزر
ؤ صبحنا بين لا... ولا... وبين المحال
ؤ بلقوال سؤال يدفعنا نسولو على السؤال على هاذ الحال لي طال وطال
فظلام فارغ شق سنين لعمر
يا صاح لكلام كثير
ولمري مابقا يعكس الشوف لبصير
والشمس غبرات في عز الظهر
صبح الهم يتشكى على الهم
يهز قدم ويحط قدم فوق الغم على الحق لي تهضم
وما تسمع منهم غير صبر وزيد صبر
جمرهم گادي وخا يبان ليك طافي
داو لفضل وراس المال وخلاونا فوسط لعوافي
كل واحد فينا فرادي فهمو محير
مركبنا وقف وكلشي سخف
ولا مجداف يجدف ولا حد ينصف
موجة تديه وموجو تصطحو مع الصخر
امتا نفكو خيوط الكبة
ونغزلو منها قشابة ليام
يمكن نصلحو سفينة ونزيدو لقدام
يمكن نخيطو بها كفن لحفرة لقبر
★عبالرحيم طالبة صقلي★
2020/08/10
Commentaires
Enregistrer un commentaire