بقلم الزجال عبد الرحيم طالبة الصقلي
حكايتي حكاية ما يترجمها كلام
ؤ حيث كلام فكلام
مايدريه غير أصحاب لنظام
ولا سكران بخمرة لغرام
حكايتي حكاية ثلاثة وضامة
لي جابت لي تمام
حكاية حب مجنون
سرو سر مكنون
كي نتفكر الدمعة تسيل من لعيون
كان قوي واش من الساهل يهون
وانت گول اش يكون فهاذ الكون
اسمعني ؤ عذرني لاتقاطعني
تنكمل عاد هضر
واحد لفجر
ضوات الشمس
على البر ولبحر
غرد الطير وتفتح الورد والزهر
والنجوم سطعات في عز الضهر
موسطها لبدر
زينو فاق كل لوصاف سبحان من صور
فتني سلبني سرق سمعي عمى لبصار
هزتني الرعشة ومجاجي داخ واحتار
هذا حلم و لحقيقة
كانت غايبة على الانظار
قربت ليه مخشع
خشوع الگمرة في وسط النهار
بنظرة بكلمة مشيت وراه
خايف مذعور
لحسانو مبهور
سرحان نخاطب طيفو
متأمل مسحور
سكرني من عيونو وشربت كثير
سجني بحال الطير
في قفز لغرام ؤ اكسر لي جناح
لنعود نطير
دخلني لهوى جنانو ضرير
شميت عطرو ؤ صبحت بصير
زينو بهاء منور
يغار منو الياقوت والجوهر
نفاسو مسك وعنبر
فايخة تنعش الروح والخاطر
تخليك سكران طول لعمر
وعلى فراقو ما تگد تصبر
ؤ بين ليلة وصباح غبر ماتلا ضهر
ؤ غربات الشمس بنهار يگهر
ؤ ذبل الورد ماعاد يزهر
ؤ نجوم طفات والگمرة غبرات
والليل تكدر
النار فالگلب شعلات
ؤ الدموع علخدود هطلات
والصرخة دبحات الصدر
گلت هذا سراب وكذبت لي صار
كيف يتنكر ويصبح غدار
حتى شفت بعيني، الهم يطويني والگلب احتار
علاش خدعني ؤ علاش زمان دار
طعني وشعل النار
ماعاد ليه فگلبي شفاعة ؤ لخيانتو
ماتلا ليه اعذار
★عبدالرحيم طالبة صقلي★
2020/08/07
Commentaires
Enregistrer un commentaire