بقلم الشاعر عبد الجليل خالدي

لاين مقصودك فين باغي توصل

تتمسكن فحديتك تلحن و  تزوق 

رخصتي السومة ؤ  لبسك  الذل

عايش  حسراف   طبعك  تتملق

عاجباك   الركبة   خايف   تنزل

على ظهور عشرانك زاطم تتسلق

الضحكة صفرة و الݣلب كحل

 ب مصايب غيرك سعدك يتحقق

مرايقي لحلاح و لسانك  منجل

لحيس الكابة ك لعلݣة  تتلصق

تبوس كفوف سيادك ؤ تتوسل

فعالك مطيحة عل الرجلة  البق

حرايمي من فعلك شعارك تتسمتل

سلاحك  نيفاق  تبوس  و  تعنق

جرثومة بين لعباد  سارح  تتختل

ناصب شباكك البق عندك ما يزهق

طالق  عينيك بلا فرانات تبرول

ما عندك مراݣة سنطيحة ما مسوق

 دقتك  مغيزة   ترييب  الجبل

ب مداد  لغدر  فعايلك  تتوثق

مصيرك ف فخاخ نيتك توغل

من مرار  برادك يا خليلي تلعق

حتامن خيالك يعيفك ؤ يجفل

نشوفك منبوذ من خيبتك تذعق

          عبد الجليل عبدالجليل خالدي