بقلم الزجالة المبتسمة دوما فاطمة خلخال

زجل..

. 

الصبر....

سمعو يا ناس

لهاذ لحكايا ..

واحد النهار ما كنت 

لا حاسة ولا داريا 

لگيت راسي وحدي 

 غارقة في الهموم

لا من يوقف معايا..

وليام غادا زربانة

 كيف الخيل الجرايا..

ركبت ركبة العلام.. 

بيدي زيرت اللجام..

وما تلفتش ورايا...

سرجت عود منيع

بصفايحو هرس

لحجر وكلو عنايا...

طلع جبال وقطع ويدان

وكانت هاذي هي الغايا...

هدرو گالو شلا كلام..

بلسان قبيح

شرعو لفام..

گالو عليا غشيمة..

ما قارية ما فهيمة..

كيفاش ركبت

هاذ الركبة الزعيمة..

سديت وذنيا ما سمعت

ليهم حتى كليمة...

تحزمت مزيان

وزيرت التحزيمة..

تلحفت بلحاف الصبر

وشگيت طريقي

بكل عزيمة...

حفرت في الصخر

بفاس واخا كانت

مصدية وقديمة...

بدااات الهدرة والنميمة..

گااالو حمقة يمكن هبيلة.. 

همهم يشوفوك 

باكية و حزينة..

ما عطيت لكلامهم

اعتبار ولا قيمة... 

 شفت فيهم زگيتَ

الشوفة وعرضت التبسيمة..

كملت طريقي كيف ديمة..

بالعمل الجاد والنية السليمة..

ربي معايا ورضات لميمة.

فاطمة خلخال .