بقلم الشاعر والزجال رشيد شرقان

¤ خليك مني بعيد ¤

عجبك حالك

ملي كبرتي ب كلامك

وصغرتي ب كلامي

مَنِّي ضحكتي ضحكة ساخرة

بينتي على نيابك

وهزيتي ف لعلالي علامك

ومرمدتي ف التراب علامي

مَنَك يكفاني 

شربتيني القطران ف كيساني

بغيتك تنساني..

ولا تقول لي نرجعو ثاني

عفاك خليك ف حالك

وخليني ف حالي

نواجه هبوب لرياح وتعوس أيامي 

شربت من كاس سقامك

ما تلات تغرني فيك ليام

ولا عدت نتيق احلامي

بريت من جرح حسامك

مسيرتي ضحات ف دربي سلام

وسمايا صفات من لغمام

خلي سحابك ف سماك

غيماتو عني حاجباك

نبغي نبقى ف واد ونتا ف واد

تشعب بيناتنا لكلام وتلف طريقه

والقلب يلا جفر يوجد راحته ف لبعاد..

توقيع:

رشيد شرقان.