بقلم الشاعر خالد فلان
خاويت الليل
خاويت الليل
وصاحبتو
وفي جنح الليل
وظلامو
يحيا الكلام
تساريت معاه وتجاذبنا
الحديث
خاويت الليل
كيفهمني ونفهمو
نبري عليه ويقلب علي
وقتاش نتلاقاو
ونتجمعو
نفرغ عليه قلبي
ونشكي ليه همي
خاويت الليل
وشاف عيني باكية
يسول في وانا
نجاوب
الا العين باكية
راه القلب موجوع
خاويت الليل
وسرت نسقسي ونسول
واش هاد الهم اللي ركبنا
مازال مطول
القلب فاضت بيه
والخاطر ما قادرة باقة
تتحمل
خاويت الليل
وملي يطيح الظلام
ويحل الليل
نحس براسي بخير
نسير نحكي ليه
وما نخبي عليه
مايخزن علي
يبوح لي بهمو
وسرارو
ومازال يسول في الليل
علاش العين ما زال
باكية
قلت ليه الركيزة
مشات
والخيمة ولات مايلة
والدنيا غادة بي وتدور
خلاتني نفكر نقطع
البحور
حيت من اعز الناس
وليت مغذور
خاويت الليل
وطولنا في البركة
والبركة ولات شركة
حيت شركت همومي
مع همومو
ما بقي كيلومني
ولا حتى انا كنلومو
وملي سولتو
ما بخل علي بجواب
وفي وجهي ما سد
الباب
ولينا اكثر من حباب
وصحاب
وقال لي صبر
ما عليك غير تصرف
المكتاب
ومن حبي الليل
وحيت خاويتو
وخاواني
صرت نفهم الكلام
والمعاني
ما بقيت نعرف نعاس
ولا ركاد
وهو يواسيني
غذا كلشي يتقاد
بناس الخير ولجواد
خاويت الليل
ملي خاويتو خاواني
وحلف لا عمرو تنكر
لي ونساني.
كلمات... خالد فولان.
Commentaires
Enregistrer un commentaire