توقيع الشاعرة حسناء العجوري

كلام الحق 

تشهد بيه السما......وٱرعادها

تشهد بيه جبال الارض وأوتادها

وكل من عايش ف الما ولا ف البر

وكلام الزور ياما ظلم ناس ؤعادها

وشحال من كلام غابت ووعودها

وشمس لحقيقة كل يوم تزيد تغبر

كلام الحق يزهق الباطل واللي قادها

يسحق الماطل  واللي ٱعتادها

واش نساو باللي كولشي ف ميزان اتعبر

والرشوة والكدبة كترو روادها

عندها لمعلمين وعندها اسيادها

شحال قدك يابنادم ماتصبر

والضمير مات ف قلوب زاد عنادها

كلمة الحق تقيلة دمر حسادها 

كتر الشكوى والجرح باقي ادبر

والفتنة شعلات النار ف عوادها

والحگرة تشكي زاد اعدادها 

واش اللي تهرس شقفات مازال اتجبر ؟؟؟

بقلم حسناء العجوري