توقيع الزجال ابراهيم بوستة

تفكرت مقدم الدوار

جاي راكب على حمار

وديك القيادة لبعيدة

تفكرت شكوة جدة

معلقاها بمسمار...

وف نواظرها

شحال من وقيدة

وضوها شمعة

تبكي النهار ...

وتذوب بين

حسرة وتنهيدة....

وحياة زينة

كلها حيا وتيقار

ما كاين لا فخ

لا مصيدة.....

زينها زين الورد

والنوار....

خضرة قبل

ما تولي حصيدة....

وما يبقى فيها

مايدار...

جات الوقت  تكحل 

وتسوك بالعرعار

ضربتها بتمرميدة...

خلات لعجول 

تزوك  بجنب الدار....

ومهم  عادصغارت

ولات جديدة.....

ضرعها غرز وصفار

وحليبها ما بقا صالح

لعصيدة...........................ابراهيم بوستة