توثيق للشاعرة حسناء العجوري
حال ..وحوال
ياااااقلبي علاش تبكي
ؤداير هاد الحالة
اللي راح مايرجع
متلة قالوها لوالة
الحب القاسي خلاك توجع
وقلبي ملكي.. ماشريتو ب دلالة
حبيبي كان سلاحي
مشا......تهرس جناحي
ونا طبيعتي ماشي بدالة
خلاني ف وجه المدفع
هدا حال الحب ليه عشاقة وملالة
قلت عمرني ماننساه
نهضر باللي حساه...
اش غادي يوقع
حال واحوال والدموع سيالة
نهضر على اللي كبر ف قلبي
وعلى عرشو تربع
غدر بالوفا ..قصة ماعندها كمالة
نهضر على حوال الناس كيف توزع
وعلى حوال الدنيا الرحالة
اللي كترو فيها الحصادة ..ولامن يزرع
ونهضر على محاين نسا د جبالة
تصبغ ف لحيوط ..وتزيد ترقع
تخدم بالليل وبنهار كيف الرجالة
والراجل ف لقهاوي اتسكع
يمشي ف طريق تالف كيف البهالة
وملي للدار يرجع..
انفخ ..اسوط اخرج لگرون
ينطح ف ديك لغزالة
حتى تقسم ظهرو عاد هو باغي يركع
نسا نهار ادخل قبرو كاين سؤال ومسألة
ونهضر على حال المحطة تشوفها تفزع
ناس تتقاتل على طرف الخبز
وناس ماهمها حوالهم دارتهم نخالة
والشقا ترسم ع الوجوه بالطابع لمطبع
ناس تلعن ..وتسب .
.عيات من التقل. ناس حمالة
ونهضر على دراري صغار تتبهدل
تبيع منادل....مقطعين صنادل
مالعبو ...ماعرفو شنو هي بسالة
ولباسهم كلو مقطع
ياحسرة. قالو عليهم عوالة
العين تدمع وحال القلب اقطع
ونهضر على ناس لمعبر راهم جوالة
تهز لحمل على الظهر
تمشي على جمر..
كسوة. وكسرة وقليلو انفع
تدبح بموس حافي..
هادو ناس ....ماشي حوالة
والزمان المر غادي كيف الغول لمجوع
لامن ايشوف الشوفة ...ولامن ايسمع
ونهضر على الزهر اللي مابغا يزهر
ف جنان لبنات الزين فيهم سلالة
ولعزارة تزوجو غير ف الخيال
قالو الواقع مر ولى كيخلع
ونهضر على الصحة ونعمة لعقل
الزهايمر تفشى والناس عليه ماسوالة
.واللي مقابلو اعاني ..والراس مصدع
واللي عينو تعمات واللي عليه جلالة
ونهضر على الصبر اللي تلفنا مفتاحو
.وباب العلم بقا لليوم مبلع
الناس مابقات تقرا كترو فينا الجهالة
واللي كان بعزو كيف السبع
رجع اتخبا ..خايف كي لغلالة
على من تعول حتى حد مابغا يقنع
ونهضر على حال الطرقان ف بلادي قتالة
اللي ايسوگ لحديد ماهمو الموت اللي تفجع
اللي تعطب ....واللي ولات هجالة
الخاطر معصب ....والقلب مقبوط ومروع
ايسيل الدم ف واد سيالة
لامن اطيع . ...ولامن اطوع
ونهضر على حال الصحة ولمرضى نعالة
الطبيب تشكي عليه ف كلامو انوع
ادهن السير اسير ..وكاس مشحر منعنع
.ونختمها بحروفي قالو ثائرة زجالة
اللي نكتب فيها نبدع ...
موهبة من عند الله الى عطاك ...مايقلع
بقلم حسناء العجوري
Commentaires
Enregistrer un commentaire