بقلم الزجال الاستاذ عبد الرحيم طالبة صقلي
*** ليام أليام ***
آه ، يا ليام غيرو طعمك وردوه مرار
نهارك ولى ليل، وليلك نهار
سدو البيبان على لحبيب و الصديق والجار
وسرقو الفرحة وخلاو الدمعة تسيل ادرار
بغيت نتكلم ونقول، خفت ل لكلام يطول،
مابقى سر ما بقى مسرار
بكيت وكففت الدمعة لطيح وتحرگ ضنايا
صرخت وحبست الصرخصة
لتخرج من صدري وتشق ارضي وسمايا
تجرحت والجرح مزگ احشايا
ولجرحي مالقيت شفايا
وعلاش باغي نتفگع
مابقى عقل ينفع
ولعين تدمع
ولروح تخشع
ولكسدة تركع
والقلب تصدع
حامل لحزان ولوجع
مابقى غير نودع
وقبل ما نودع
تصنت ليا وسمع
عصرت دمي، وصنعت منو دهنة
طليت بيها الگلب من صدا لعذاب
ونصبتو ثمتال فغابة لذياب
ورفعتو عالي فوق سحاب
ما يوصلو سم ماتهرشو نياب
حتى يصبح عادة وتقليد
وموسم للمجروح
لي مرغوه في المرمدة والتراب
يزورو كل محروم عاش حياة السراب
يتبرك منو يمكن يفك خبالو
ويفتح ليه الباب
ويسلم روحو لباري لهوال
ويمسح الدمعة لي على خدو تنهال
ويكتب اشعارو ويغنيها موال
ويتسنى ضربت حظ او عثرت فال
حتى يرتاح لو البال من القيل والقال
ويدور الزمان ويتغير الحال من حال لحال
** عبد الرحيم طالبة صقلي **
2020/08/17
Commentaires
Enregistrer un commentaire