بقلم الزجال الراجي رمالي
# مول السلهام #
كلامي و كلامك واحد
يا بو صاح كلام
فكرت نجيك تعثرت
و طاح لي سلهامي
الجو كان علي قاسي
درت يدي ف كمامي
و مشيت مع تخمامي
نتأمل ف الحال و الحوال
يا صاحي مبقى مايتقال
الساحة لعبو فيها الحمير و البغال
~~~~~~~~~~
الزرايب متعرعة محلولة
المطامر فارغة مردومة
البهايم غرزات ذابت الفحولة
الفرسان ضاعت و مشات
السروج خاوية بقات
مول القصبة يجري فرحان
على قصبته يحرك
السروال طايح العقل مصمك
~~~~~~~~~~
شفقت على مول السلهام
الشمار تقطع العمامة ترخات
مول السلهام حنتاتو اليام
و صبح ف بلاده براني
يولول يا ميمتي آش داني
نسد فمي ما يبانو سناني
قالوا ناس بكري و زمان
الفم المسدود مايدخله دبان
الشهامة و النخوة مشاو من زمان
~~~~~~~~~~
تفظرت المدية الماء تسرب
صبح شي مشرق شي مغرب
سولو المجاديب سولو العرافة
واش المجرب يعاود يتجرب
هذا حالنا و احنا مواليه
صغيرنا شاخ و شاب
و كبيرنا الريح اللي جا يديه
~~~~~~~~~~
تخلط الحابل بالنابل
شي عالكراسي طالع
شي على مسمار مصدي نازل
شي من الفرحة ساير يرقص
شي من الحسرة خلاوه عالضص
يا مول السلهام علاش ماتفتح عينيك
حقك اللي ضاع يرجع ليك
ترجع هيبتك و سلهامك
الأيام زوينة باقية قدامك
******************
الراجي رمالي
اللوحة لﻷستاذ و الفنان التشكيلي جمال الزكراوي
Commentaires
Enregistrer un commentaire