توقيع الشاعر محمد لمنور

===لهبيل تكلم===

شكون يدي عليك ألهبيل

قلبي وكلني عليك ألهبيل

ضاع منك كلشي 

بقات ليك غير السما

وشكون يدي عليك

دموعك نقطات من السحاب

ورموشك قفطان بيه تتبلى

حقك حلم وشكون يگلعو ليك

وحلمنا حنا كحل فاخر

قلبك طفل صغير 

مراكبي على موج لهوال عوالا

وجلابتك بحر غارق 

سدى وطعمية 

قفال طعام لگنازة

سير أولدي اللهبيل

بغيتك كيف لفحل الطايع

الراكب الدهم الملجوم

المغيار على دخول لقبيلا

تكون براد مشحر 

حلو من فم لفم

وا أمي.... وا أمي

طلي على ولديك لهبيل

المطوع قلعة السراغنة وأيت عتاب

القاسم الصبر والتاويل

نافر من لعباد 

كيف لكفوف النافرة الحنة

الهايج على الظلم والمنكر

ولدك لهبيل غير طلي أمي

السارح لغيوم الغاير من الطيور

الطاير بلا جناح رماد 

حلمك حلمي هبيل

المنهوبا قصايدو تبكي

تترجى العالي تشكي

فوقاش لهبيل إدير عقلوا. 

بقلم محمد لمنور.