بقلم الدكتور الشاعر بوشعيب سايح

زجل مغربي

غربة الروح/

روحي غربت وانا بقيت ناسك

 نتعبد زاهد نمد للسهل دراعي

 نمسح عرق الشمس نتلمس القمر بصباعي

 ناجي النجوم ونداري

 بلهموم مكلوم محموم مهزوم 

مغبون مجنون مدفون تحت سابع أرض

 السنة والفرض شراعي

 فيدين الكون فغسق الدجا 

روحي تغربت يا زمان يا زمان

 وشمت لك برماد العشق

 لبَّستك حلة قشيبة لا لوشام دام

 ولا لباسك قاوم لبلا

 كحلت لك عينيك يا روحي 

حنيت ليك رجليك فرحان 

نزفّك نصونك ونلمّك 

فصندوق منقوش وزواقو بلدي

فين تغربتي يا الروح ردّي لي لجواب

 ردّي تيهي كيف تهت 

حسي بهبالي سوارك والروح

 يا مدينة شاحبة حزينة عاقلة

 رزينة يا روحي غرقتيني فالتيهان

  كريمة فوق العادة عطات اللول 

والثاني والثالث والرابع ميا وألف

 لي حالف يا مدينة بحلوفو

 ما يخطوي خطوة بلا بيك

 ما تحرقو نيران الغربة 

ما يغلبو هجران الصحبة يموت ويفني 

عمرو المهم يرجع ليك

 وليّ فهواك متلّي فاتوه بقرون

 وهوّا واقف فطريقو الهوا يخلّف خلفة لقدام

 ويرجعوه رجليه للتيه من صياح القوم 

يسد وذنيه فعينو صورة وحدة 

مّزْقة أشلاء متناثرة حد الشوف 

لاقيا الروح فوجهو فاتحا لو صدرها 

ومالك يا الروح تغربتي؟وخليتيني في التيه

د/بوشعيب سايح