بقلم الزجال محمد حديش

{زجل مغربي}

عيشورا

~~~~

بسم الله الكريم المنان زممنا الكلام

والصلاة والسلام على نبينا العدنان

عيشورا مبروكة عليكم دْخَلْتها ياكرام

ناس دايزها الكﻻم أهل الصفا المنور

عيشورا خيورها كترا ؤصيامها سنة 

وأجرها بْحور فاز فضلها كل مومن

لوسع لخوه وأهلو ربح هنا ولهيه

هاد كلام حصاد صابت الخير مگمح

الأجر مْعَشَّرْ والسْميحْ يَتْرَجَّا الگدَّامْ

يا حضار الخير فَلْحو زريعة العواشر

تكبر تامرة عطية ربانية تْسَرْ الگلب

ما شي عيشورا الفاكيَة والتَّغْلاق 

شهرها محرم زكاة تعطا المسكين

ؤالكرش الشبعانا تحس بالخاوية

سرح عينيك يافلان ؤفلح خير تحصد

النفس ملهوفة والعمر يْقَرَّبْ القْبَرْ

العواشر بْخورْها عْطات روايح ألوان

البنات البتات غنات بالطعارج محنيات 

هادي عيشورا ماعْلينا حْكامْ أََلالَّ

ؤُبابا عاشور نَوَّرْ مْجَيْتو المْكان فَرْحْ

كل بيت بْخور ؤُتَفْوارْ رحيتو عْطاتْ

الگْصاعي زَرْزْراتْ الجْوامَعْ حَلْقاتْ

ؤُزْناقي القْنابَلْ عَنْدْ دْراري گَعْگْعاتْ

خطرها شلا مصايب أدات الناس باطل

ؤالوليات تْكَسْكَسْ حْداگَةْ دَيَّالاتْ العيدْ

عادة مغربية قُحَّا مَوْروتا مَنْ جْدَّاتْ زْمانْ

والعْيلاتْ العاگْراتْ جَمْعاتْ مْياتْ گَدِّيدا

وَتْهَزَّاتْ وْتقاتْ حْفالي دايزها الكْﻻم

نيتهم إِتْفَكْ سَعْدْهُمْ بْتَرِّيكا تْوَنَّسْهُمْ

ؤناس همهم التشعويد متلفا الناس

الشوافات فالليلا تخنقو بَدْخاخنْ البْنُوَّاتْ 

تْقاداتْ تيبيخَّا دْيالْهُم ؤُكَتَّفْهُم شَرْ فْعَلْهُمْ

ما نفعهم شياطنهم ولا سحورهم بطل

جْمَرْ العْوافي تَگْدي في شرهم لَلْفحر

عيشورا جمعات خيلوطا مْنَوْعا ألوان

غير صفي تشرب ؤكل مشرار يخلص

الهدية ربانية تصفي الگلب من الزلات

فاز بها ناس عقولهم منورا خير مَسْكْ

ونختمو بالصلاة والسلام لخير الأنام

محمد حديش