بقلم الشاعر محمد دومو

بقلم: الشاعر المغربي محمد دومو

مكانية تيقة

(زجل مغربي)

مابقى فالدنيا والو من غيرك يا لميمة

كنت مزال صغير و الدنيا مزالة سليمة

واليوم وليت كبير و قادر نميز الناس

شكون فيهم لي يبغيني وكثرتهم وجيع الراس

لا تخاف من الدنيا وسير و ديما هز الراس

وتحلى بالصبر كثير وديرو سلاح حياتك

إلى محنك اليوم غذا راه يفيدك

ما كنت نعرف والو وغاذي غير بالنية

حتى تفجأت كثير بلي الطريق صعيبة

حب الناس مزية ودير بالك باش تعيش

ستي صحبك مزيان وياك من ذاك الدرويش

لا تيق في الناس كثير راك بالتيقة تتمحن

ولا دير صحاب كثار عند الشدة ما تلقاهم

وتحلى بالصبر كثير وديرو سلاح حياتك

إلى محنك اليوم غذا راه يفيدك

لي ما عضو النحل ما يذوق حلاوت لعسل

ولي ما سهر كثير ما عرف سر النجوم

ولي ما تمرث عالفلوس ما يعرف يديرهم

ولا تيق بالناس كثير راك بالثقة تتمحن

ولا تلاح كثير راه جهد لحلاوة زبيبة

ديما شوف قدامك واياك ترجع اللور

وتحلى بالصبر وسير وديرو سلاح حياتك

إلى محنك اليوم غذا راه يفيدك

ولا تيق بالصحاب كثير وفكرغير فراسك

يضحكو عليك كثير ملي راك تتدمر

ويحاربوك كثير ملي غادي تتكرم

لا تيق فالناس كثير وديما عش حياتك

من بحالي دازو كثير ومول المعنى مسافر

ولي وقف يبقى تعبير وتلقاه ديما كافر

وتحلى بالصبر وسير وديرو سلاح حياتك

إلى محنك اليوم غذا راه يفيدك

الحب راه غير كلمة وفالدنيا ما تلقاه

تيق فالله كثير و ديرو فتوكيلك

ولا تخاف وسير وديما راك فحماه

كون كان الخوخ يداوي كون داوى راسو

طريق راه صعيبة لا تفيق حد من نعاسو

وتحلى بالصبر وسير وديرو سلاح حياتك

إلى محنك اليوم غذا راه يفيدك