توقيع الزجال الشاعر بنعيسى عنازة

راح داك التاويل

وتْفْرس الصواب كي الجيفة

صار ضيف الله هبيل

وظنوه شاد فينا حْسيفة

مرود لكحل فالعين مالو مثيل

ولمراية براكة غِي شْقيفة

تعواگ موكة طوَّل بالليل

والتونية كلات لمليفة

كان القرشال للِْخَلالة خْليلْ

رشاو سنانو طارت الصويفة

كان القيداح من الحنبل سليل

اليوم بار شانو رجع كي العيفة

وسدى الحايك فالمنول طويل

حتى النجَّة مسخت فالسفيفة

الشوَّاط فالمطَّة معرَّم مالو نزيل

وتا لحصيدة تسدت بالدفيفة

طُولْ السفاية في السبولة قليل

والزرعة حشمانة فالگاعة عفيفة

لوح الدْرَى كان الحب منو يسيل

ما بقا عْشور يوصل لباب الشريفة

الشبكة فوگ المحروم غادة تميل

وتبنها ماعاد يليق للرتاعة

ولا بقات لو فالتبلاط سيفة

الكمشة فعين الرحى تحيل

واليد عگرت ماتطحن تا صحيفة

ضرس التيلة تغربيلو گليل

والكسكاس بلا قفال حكايتو طريفة

تبواخ طعامو عليل

يضر المريض لي عندو المعدة رهيفة

السمن فالقلوشة يحيل

غمل ولات ريحتو زعيفة

الغلة هاترة والمعزة كي الفيل

وفترعة الجنان دارو عريفة

الزعبولة تخاف من القراص الطويل

والظلفة لوات فالقور مدلية سخيفة

كرموص الجنان جنب الواد مالو مثيل

والكرطوطة تحت لكرم دايرة ستيفة

التاويل حالو كشف ولى ذليل

فنظرة عين مابقات لو شويفة

وتا الصواب غبر ما تلا يقيل

ولا بالليل يتعشا طعَيْمة وسْفيفة (السفة)

بقلم بنعيسى عنازة 5/9/2020